Члены ФТЦАН г.п. Смілавічы разам з протаіерэем Мікалаем Літвінчыкам наведалі музей Халакосту ў СШ № 1 г.п. Смілавічы

Сёння члены ФТЦАН г.п. Смілавічы разам з дабрачынным Чэрвеньскага раёна протаіерэем Мікалаем Літвінчыкам наведалі музей Халакосту «Ведаць, каб памятаць, — памятаць, каб жыць», які адкрылі ў сярэдняй школе № 1 г.п. Смілавічы. Прысутныя звярнулі ўвагу на музейныя прадметы, якія даюць уяўленне аб жыцці яўрэяў да вайны.

Трагедыю Халакосту вучні адлюстравалі ў малюнках, у якіх выказалі свае пачуцці, эмоцыі, перажыванні. Людміла Драпеза распавяла пра смілавіцкае гета, пра тое, як растралялі 2000 яўрэяў. З вялікай цікавасцю прысутныя слухалі аповед пра зверствы нацыстаў, пра тое, як Маісею Гарэліку ўдалося вырвацца з гэтага пекла і застацца жывым.

Не менш цікавым быў аповед пра тое, што былі людзі, якія, ахвяруючы сваім жыццём, ратавалі іншых. Гэта былыя настаўнікі школы Феадосія Халадзінская і Аляксандра Лубачкіна, якім пасмяротна прысвоена ганаровае званне «Праведнік свету». З пачуццём удзячнасці за блакітнае неба над галавой, за мір і спакой на нашай зямлі пакідалі прысутныя музей. Памяць аб тых, хто загінуў ад рук нацыстаў, будзе жыць вечна ў нашых сэрцах.